२०७८ बैशाख ७ गते मङ्गलवार

फैसलाको तीन दिनपछि ऋषि कट्टेलको विज्ञप्तिः अधिनायकवाद लाद्ने गुरुयोजना असफल



काठमाडौं । नेपाल कम्युनिष्ट पार्टीको आधिकारिताबारे सर्वोच्च अदालतले फैसला सुनाएको तीन दिनपछि आधिकारिक नेकपाका अध्यक्ष ऋषि कट्टेलले विज्ञप्ति जारी गरेका छन् ।

उनले फैसलाको स्वागत गर्दै ‘दुइदलीय अधिनायकवाद लाद्ने प्रतिक्रियावादीको गुरुयोजना असफल भएको’ टिप्पणी गरेका छन् ।

‘विसर्जनवादमा पतन भएका एमाले र माओवादी केन्द्र मिलेर बनेको पार्टीले कथित शक्तिको उन्मादमा उनीहरू आफैंले बनाएको संविधान र कानुनविपरीत निरंकुश सर्वसत्तावाद लाद्न खोजेका थिए,’ विज्ञप्तिमा भनिएको छ,

‘संसदवादी पूँजीवादीमा पतन भएका कथित कम्युनिष्ट नामधारी पार्टीले प्रतिक्रियावादीको कथित दुई दलीय अधिनायकवाद लाद्ने गुरूयोजना अन्तर्गत एकतावद्ध गरिएको प्रपञ्च एक हदसम्म यो निर्णयले असफल पारिदिएको छ ।’

यसले समाजमा रहेको वर्गीय लगायतका शोषण र विभेदका विरूद्ध संघर्ष गरिरहेका वर्ग समुदाय तथा राष्टिय स्वाधीनताको पक्षमा उभिएका देशभक्तहरूमा उत्साह थपेको पनि कट्टेलले बताएका छन् ।

पार्टीको साखमा वृद्धि भएको तथा नीति, विचार, सिद्धान्त थप प्रचारित हुने मौका पाएको उनका संस्लेषण छ ।

‘सारमा इमान्दार जनताका असली प्रतिनिधि र पार्टीको विजय भएको छ,’ कट्टेलले भनेका छन् ।

प्रकाशित मिति : २०७७ फाल्गुन २५ गते मङ्गलवार