दाङमा पछिल्लो समय चर्चामा रहेको पर्यटकीयस्थल हो, ज्यामिरे दह ।
घोराही उपमहानगरपालिका–१३ स्थित बाह्रकुने दह भएर जान सकिने ज्यामिरे दह घोराही बजारदेखि करिब सात–आठ किलोमिटर टाढा रहेको छ ।
बाह्रकुने दहबाट पैदल हिँडेर त्यहाँ पुग्न सकिन्छ । ज्यामिरे तालमा डुंगा चढ्नदेखि घुमफिरका लागि मानिस जाने गरेका छन् ।
प्रदेश सरकारले डिभिजन वन कार्यालयमार्फत पहाडमा सिँढी निर्माण र रेलिङको व्यवस्था गरेपछि ज्यामिरे पैदलयात्रादेखि बोटिङसम्मका लागि चर्चामा छ । आन्तरिक तथा बाह्य पर्यटकको आकर्षण भइरहेका बेला उक्त ठाउँमा फोहर व्यवस्थापनको समेत चुनौती देखिएको छ ।
बाह्रकुने दह हुँदै ज्यामिरे पुग्ने मानिसले लैजाने प्लास्टिकजन्य फोहरका कारण प्रदूषणसमेत बढेको घुम्न जाने मानिसले बताउने गरेका छन् । उक्त स्थानमा बाटैभरि फोहर बढ्दै गएको ज्यामिरेमा व्यवसाय गर्दै आएकी राधा गिरीले बताइन् ।
दाङको अर्को महत्वपूर्ण धार्मिक पर्यटकीयस्थल घोराही उपमहानगरपालिका–५ स्थित पाण्डवेश्वर महादेव मन्दिर हो । यहाँ ‘विश्वको सबैभन्दा अग्लो’ त्रिशूल हेर्न, घुमफिर गर्न साथै मन्दिरमा पूजापाठका लागि मानिसको दिनहुँ भिड लाग्ने गर्छ ।
मानिसको आउजाउसँगै चाउचाउ, बिस्कुटलगायतका प्लास्टिकजन्य फोहर तथा पिकनिक खान आउनेहरुले गरेको फोहर व्यवस्थापनमा समस्या हुने गरेको पाण्डवेश्वर महादेव मन्दिर व्यवस्थापन समितिका सचिव विष्णुराम आचार्यले बताए ।
“मन्दिर क्षेत्रमा फोहर नहोस् भनेर सचेतनामूलक बोर्डहरुसँगै ठाउँ–ठाउँमा डस्टबिन राखेका छौँ,” सचिव आचार्यले भने, “त्यही पनि विभिन्न स्थानमा फोहर देखिने गरेको छ ।”
मन्दिर क्षेत्रमा सरसफाइका लागि चारजना कर्मचारीहरु समेत राखेको आचार्यले जानकारी दिए ।
लमही नगरपालिका–३ मा स्थित जखेरा तालमा पनि फोहर व्यवस्थापन समस्याका रूपमा रहेको जखेरा शिवालय धार्मिक पर्यटन विकास संरक्षण प्रतिष्ठानका कार्यालय सचिव सरिता चौधरीले बताइन् ।
तालमा डुंगा चढ्न आउने, मन्दिर घुम्नेसँगै पिकनिक खान आउने मानिसले जथाभावी रूपमा फोहर फाल्ने गर्ने गरेको उनको भनाइ छ ।
“पर्यटकीयस्थललाई सफा र सुन्दर बनाउनका लागि नियमित सफाइसँगै फोहर राख्नका लागि ड्रमहरु राखिएका छन्,” उनले भनिन्, “तर पनि मानिसहरु चाउचाउ, बिस्कुट, पानीका खाली बोतल फोहर राख्ने ड्रममा नराखेर बाहिरै फाल्ने गरेका छन् ।”