२०७८ असार ५ गते शनिवार

शिक्षा मन्त्रीसँग सुदुरपश्चिमका शिक्षकहरुसँग अन्तरक्रिया



सुदुर पश्चिम। नेपालका समृद्धिका लागि विद्यमान शिक्षा नीति परिवर्तनको खाँचो देखाउँदै शिक्षामन्त्री कृष्णगोपालले श्रेष्ठले आफू शिक्षा ऐन २०२८ परिवर्तन गर्ने योजना रहेको बताउनुभएको छ ।

सूचना प्रविधिको बढ्दो प्रयोग, परिवर्तन भएको शासकीय संरचनाजस्ता जस्ता कारण पुरानो ऐनले परिणाम ल्याउन नसक्ने उहाँको भनाइ छ । डडेल्धुरा जिल्लाबाट शैक्षिक अवलोकन भ्रमणका लागि काठमाडौं आएका शिक्षक र शैक्षिक क्षेत्रसँग सरोकार राख्ने अधिकारीहरुसँगको अन्तरक्रियामा मन्त्री श्रेष्ठले भन्नुभयो — ‘विकास व्यवस्थापनका लागि व्यक्तिगत सोचले पहिलो भूमिका खेल्छ ।

यसको मेरुदण्ड शिक्षा हो । देश गणतन्त्रात्मक व्यवस्थामा गएपछि शैक्षिक क्रियाकलाप पनि परिवर्तित सन्दर्भमुताविक नै बनाउनु पर्छ । मन्त्रालय अहिले यता लागेको छ । ’सुदुर पश्चिम क्षेत्रको डडेल्धुरा जिल्लाको अजयमेरु र गन्यापधुरा गाउँपालिकाकाबाट जनप्रतिनिधिसहित विद्यालय व्यवस्थापन समितिका प्रतिनिधि, प्रधानाध्यापक, शिक्षक÷शिक्षिका, सामाजिक विकास समितिका संयोजकहरु अवलोकन भ्रमणमा आउनुभएको छ ।

लू निभाः (बाल सरोकार समूह) ले व्यवस्थापन गरेको अवलोकन भ्रमणमा ३७ जना प्रतिनिधि सहभागी हुनुहुन्छ । ‘गाउँका शैक्षिक समस्या, प्रदेश हुँदै संघसम्म पु¥याएर शैक्षिक विकासमा सहयोग गर्ने कार्यक्रमअन्तर्गत अनुभव र सिकाइ आदान प्रदान गर्ने कार्यक्रम गरेका हौं ।’ कार्यक्रमका बारेमा जानकारी दिँदै लू निभाः का कार्यकारी निर्देशक नरेन्द्र डंगोलले भन्नुभयो — बाल केन्द्रीत सिकाइको प्रवर्धन गर्नु अहिलेको आवश्यकता हो ।

लूः निभाले ग्रामीण शैक्षिक सुधारका लागि यी २ वटा गाउँपालिकाका परियोजना सञ्चालन गरिरहेको छ । म्याचिङ् फण्ड (जोड कोष) बाट सञ्चालित परियोजनामा पालिका, लू निभाः र समुदायस्तरको सहभागिता छ । कार्यक्रम व्यवस्थापक सन्तराम डंगोलका अनुसार शैक्षिक गुणस्तर सुधारका लागि नीति पैरवी गर्न सन् २०१९ को जनवरीबाट यो परियोजना सुरु गरिएको हो ।

परियोजना सन् २०२२ को डिसेम्बरमा सकिनेछ । शैक्षिक भ्रमणमा आउनु भएका प्रतिनिधिहरुले ललितपुर र काभ्रेका ४ वटा विद्यालयको बाल सिकाइ अभ्यास अवलोकन गर्नुहुनेछ । लूः निभाका कार्यक्रम संयोजक कृष्णगोविन्द महर्जनकाअनुसार गोदावरी नगरको डुकुछापमा रहेको दनुवार समुदायमा रहेको चण्डादेवी आधारभूत विद्यालय, पाटन ढोकामा रहेको रातो बंगाला विद्यालय, काभ्रे जिल्लाको धुलिखेल नगरमा रहेका सरस्वती माध्यमिक विद्यालय र बिनायक बाल आधारभूत विद्यालयको सिकाइ अभ्यास अवलोकन गरिनेछ ।

अवलोकनका क्रममा स्थानीय पाठ््य सामाग्री उत्पादन, उत्पादित सामाग्रीको सिकाइका क्रममा प्रयोग, स्थानीय सरकारका नीति, उत्प्रेरणा, वहुशिक्षण बिधिलगायत बिषय मुल रुपमा आदानप्रदान हुनेछन् ।

प्रकाशित मिति : २०७७ फाल्गुन १० गते सोमवार