रामचन्द्र न्यौपाने
डोल्पा १७ पुष
हिमाली जिल्ला डोल्पाबाट दुई जना कोरोना संक्रमित बिरामिको हेलिकप्टरबाट उद्धार गरिएको छ ।
ठुलिभेरी नगरपालिकाका ६० बर्षिय एक वडा अध्यक्ष र सदरमुकाम दुनै स्थित सरस्वती माध्यामिक बिद्यालयमा कार्यरत ५४ बर्षिय शिक्षकको कैलाश एयरको हेलिकप्टरबाट उद्धार गरिएको हो ।
दुबै जना संक्रमितको अवस्था गम्भीर रहेकाले हेलिकप्टरबाट उद्धार गरि काठमाण्डौ लगिएको प्रमुख जिल्ला अधिकारी माधव प्रसाद ढकालले बताए ।
केही दिन अघिमात्र कोरोना रिपोर्ट पोजेटिभ आएका दुबै जनाको स्वास्थ्य अवस्था सामान्य भएपनि बिहिवार देखि दुबै जनाको अवस्था थप जटिल बनेको प्रजिअ ढकालको भनाई छ ।
जिल्लामा निशेषाज्ञा गर्ने,बिद्यालय बन्द गर्ने लगायतका बिषयमा छलफल भैरहेका प्रशासनको भनाई छ ।
सदरमुकाम दुनैमा कोरोना संक्रमणदर दिनप्रतिदिन फैलिरहे पनि जिल्ला प्रशासन कार्यालयले मौन बसेको स्थानीय ओमबहादुर डाँगीले बताए ।
जिल्लामा कोरोना संक्रमण दर बडिरहँदा नाका बन्द गर्ने,सदरमुकाम शिल गर्ने लगायतका कुनैपनि किसिमको कदम प्रशासनले नउठाएको डाँगीको भनाई छ ।
सुरुमा जिल्ला प्रशासन कार्यालयका केही कर्मचारीमा कोरोना संक्रमण देखिएको र त्यसपछि अन्य व्यक्तिमा फैलिएको बताइएको छ ।
जिल्ला बाहिरबाट भित्रदा सुरक्षाकर्मीले सर्वसाधारण व्यक्तिलाई मात्रै निगरानी राख्ने र ठुलाबडालाई कुनै चेकजाँच रिपोर्ट नहेरै छोड्ने परिपाटीले डोल्पामा संक्रमण फैलिएको सरोकारवालाहरुको भनाई छ ।
हालसम्म डोल्पामा नौ जना कोरोना संक्रमित रहेकाछन् ।
उद्धार गरिएका दुबै जनालाई उनिहरुकै खर्चमा साडे छ लाखमा हेलिकप्टर चार्टर गरि पठाईएको बताईएको छ ।